政壇：鐵頭仁申報又甩漏

白鴿黨「鐵頭仁」何俊仁多次被踢爆漏報利益，佢尋日交番畀立法會嘅個人利益登記冊亦諸多甩漏，尤其係喺持有土地及物業一欄明明已經答咗話「有」，但填寫有關資料時就「沒有」兩個字大大隻寫喺中間，之後先至劃去。唔通真係漏報成習慣，要改都好難？

立法會尋日上載咗鐵頭仁嘅個人利益登記冊，原來鐵頭仁嘅申報依然係甩漏多多。首先喺選舉捐贈一欄，佢申報有收到捐贈，不過就「有侍（待）核實數子（字），稍後補充」。十個字錯咗兩個，唔通有讀寫障礙？

依然未報齊

喺土地及物業一欄，佢明明答咗有物業，但填寫資料時都無啦啦寫咗「沒有」兩個字，之後先劃去再改，填番佢有份嘅兩個物業，分別係「在九龍與他人共同持有」和「在港島透過Fountain Success持有50%業權」。不過，佢依然冇報自己係持有白鴿黨總部物業嘅公司SOUND FACTOR嘅股東。

之前同樣畀人揭發涉嫌漏報利益嘅公文袋湯家驊，尋日亦都交咗議員個人利益登記冊，而佢早前涉嫌漏報嘅公司亦都一一申報番。睇嚟鐵頭仁真係要檢討下。