警方巡查求其 老蘭淪九反地

毛澤東有句名言：「掃帚不到，灰塵照例不會自己跑掉。」呢句話只係講出事實一半，其實，搞清潔唔止要用掃把，而且要勤力掃、密密掃，如果唔係，只會愈掃愈黑嘅咋。

嗱，中環蘭桂坊就係咁喇。《太陽報》同《東方日報》早前大篇幅報道，揭發呢個國際著名旅遊蒲點治安不靖，亂象叢生，既有南亞裔黑幫入侵，引發各種罪案，又有大批高鐘北妹游走街頭覓食，專門勾搭洋漢。警方事後亡羊補牢，急急拉大隊去老蘭掃蕩，似模似樣咁，家陣幾個月過去啦，結果掃成點呢？

大家不妨睇睇警方嘅數字。今年頭八個月，警方總共巡查蘭桂坊一千零七十二次，貼近舊年全年嘅一千二百九十二次，但係今年頭八個月，蘭桂坊已經發生三百一十九宗刑事罪案，比舊年全年嘅二百八十七宗勁升一成一，當中非禮同襲警案分別上升三成三同六成六，其他類別罪案更加激增八成四添。

即係話，警方巡查得愈密，蘭桂坊嘅罪案就愈多，你話係咪好笑吖。究竟係乜嘢原因呢？只可能有兩種解釋：一就係巡查馬虎求其，二就係虎頭蛇尾。有區議員指蘭桂坊嘅真實情況仲嚴重得多，由於警方打擊不力，執法不嚴，當局公布嘅罪案數字可能只係冰山一角嘅咋，叮！

最奇怪嘅係，警方公布嘅罪案數字竟然無強姦類別，難怪被區議會質疑刻意隱瞞。係人都知，近年老蘭頻生風化案，有色魔尾隨醉娃意圖不軌，亦有人用俗稱「炸彈」嘅超級迷姦水周圍「炸女」。有關注團體踢爆，過去曾接到唔少強姦個案，由於受害者對警方冇信心，認為報警都冇用，所以寧願啞忍。試諗吓，警方連受害者都保護唔到，又點樣打擊罪惡維護治安？

咪話太一叮唔提醒，時近萬聖節同聖誕節，又係不法分子同色狼傾巢而出嘅高峰期，警方掩耳盜鈴係無用嘅，加強打擊先係正路。人哋外國嘅酒吧街大多秩序井然，治安良好，人來人往，相安無事，而香港連一個蘭桂坊都搞到烏煙瘴氣，亂象叢生，簡直失禮死人。

一句到尾，國際知名旅遊景點變成鳥煙瘴氣嘅九反之地，香港乜嘢形象都冇晒，再咁落去，好客之都隨時變成趕客之都，唔係講笑o架，叮！