政壇：離開立會陳淑莊猛隊酒

前晚七點，見到競逐連任立法會議員落敗嘅Tanya陳淑莊，相約一男一女好友喺金鐘太古廣場某餐廳食晚餐，見佢頻頻同友人碰杯豪飲，心情似乎未受政途暗淡影響。坐低半粒鐘後，佢同女性友人起身離席，原來係行落商場樓下嘅超市Shopping。

佢哋話咁快掃咗一支心水靚紅酒。冇帶環保袋嘅Tanya，索性拎住支酒步回餐廳再飲過，表現豪邁。三人你一杯，我一杯，飲到夜晚九點鐘先走。離開時，男性友人親自護花，莫非係新男友？

致電Tanya查詢，佢格格大笑話：「拍拖都唔會喺咁公開嘅地方喇，係普通朋友嚟咋。」佢笑言依家每朝五點起身準備開咪，連化妝都冇時間。

新一屆立法會議員今日宣誓就職，不過冇陳淑莊份。硬朗嘅佢已為自己鋪定後路，正計劃喺報紙、雜誌寫專欄，又考慮重操故業做律師，聽落分分鐘精彩過做議員噃。