政壇：坐慣AM車麥齊光唔識路
因涉嫌呃取政府租金津貼，成為本港史上局長任期最短嘅發展局前局長麥齊光，尋日晏晝拎住袋嘢喺港鐵上水站C出口穿插於一眾水貨客之中，記者上前影相，佢即刻煞有介事話「做乜影我相！」仲爆咗句「我係返香港o架！」唔知係咪驚人懷疑佢走水貨入內地。
當記者道明身份時，佢先展露笑容話「有咩好影吖」。同行除咗有個嚟自英國嘅工程師外，仲有一名中國人，佢話帶個老外去睇吓香港有乜工程，兩人仲拎住一模一樣嘅環保袋。
麥齊光又話依家生活好好，得閒會做義工，但對於佢單涉嫌呃取政府租金津貼案件就一概唔回應。另外，以前坐慣AM車嘅佢，可能搭唔慣港鐵，期間佢問記者點樣去番往紅磡方向嘅月台。
麥齊光話帶老外工程師（左）睇吓香港有咩工程。