政壇：鐵頭仁煮鴿大細超

有需要長者究竟可唔可以如期悉數領取二千二百蚊嘅特惠生果金仲係未知之數，但可以肯定嘅係長者需要已成為政黨叫價嘅政治籌碼，連白鴿黨「大腦」、扶貧委員會籌備小組成員羅致光前排都睇唔過眼，暗指白鴿黨「民粹過民粹」冇政治道德，仲話今次事件或多或少促成佢辭退中常委淡出白鴿黨，疊埋心水做番個普通黨員算嘞！

冇膽同「大腦」劃界

冇咗大腦後嘅白鴿黨，連出份聲明都慢半拍。白鴿黨福利政策發言人「鐵頭仁」何俊仁前晚就漏夜出聲明，但聲明措辭溫和到不得了，只係話會絕對尊重黨員個人嘅意見。回想起當日馮煒光為申請做政助副局長，搞到要退黨；而狄志遠一句話支持國民教育之嘛，就換來鐵頭仁四日內三發聲明狠批，仲講到要受到黨紀處分，惟恐市民大眾唔知該黨有鴿「叛變」，同樣係「叛變」，但三人待遇真係相當唔同。究竟白鴿黨今次係自知理虧，定係冇「腦」之後，終於領悟到和平理性非暴力嘅真諦？

真相往往都係殘酷，白鴿黨今次「溫和」回應大腦「變節」，睇怕係唔敢得罪「大腦」居多。係人都知，為保障個人私隱，棄置電腦前宜先「洗機」，何況是一個黨嘅「大腦」呢？如果大家心水清，就會記得每逢有關白鴿黨選舉事務，以至當日白鴿黨被揭發黨內帳務混亂，都係由「大腦」羅致光出嚟解畫，可想而之，「大腦」內係有幾多「機密」，所以睇怕都係白鴿黨冇膽同「大腦」劃清界線居多！白鴿黨「冇腦」之後都叫做仲有三分清醒o架！