無殼蝸牛猶可憐 老無所養更堪虞

關愛基金又派錢喇！今次輪到居住環境惡劣嘅低收入人士受惠。雖然話長貧難顧，但對基層市民來講，紓困措施有總好過冇。

政府透過關愛基金向租住板間房、劏房、天台屋等非綜援嘅低收入「N無人士」發放一次性津貼，金額由三千至八千元不等。預計全港會有一萬三千戶、約三萬人受惠。津貼尋日開始接受申請，為期六個月。

由於前朝政策失誤令房屋供應失衡，香港樓價近年升到阿媽都唔認得，租金亦水漲船高，如果按呎價計，有啲劏房租金仲貴過半山豪宅，問你點頂！家陣連中產都頂唔順租金狂飆，淪為劏房常客，低收入「N無人士」更加苦過弟弟，隨時冇瓦遮頭要瞓街。

雖然今次只係一次性津貼，但目標明確，就係幫無法受惠現有社會福利政策嘅漏網之魚解決燃眉之急。新政府上場百日，扶貧有料到，「民生無小事」總算冇齋噏。

講開又講，關愛基金成立以來，扶貧措施名目繁多，令市民眼花繚亂。由資助清貧學生遊學、資助合資格長者鑲假牙、向工廈非法改建劏房住戶發放搬遷津貼，到為輪候綜合家居照顧服務嘅長者提供家居清潔及陪診服務津貼、向新移民派錢等等，五花八門，包羅萬有。

弊在睇來睇去，基本上都係細眉細眼，濕濕碎碎，既無焦點，亦欠缺系統，效果大極有限，正一買鹽唔鹹，買糖又唔甜。當局與其話為窮人紓貧解困，不如話應付輿論，為施政甩漏補鑊，唔怪得關愛基金畀人叫「萬金油基金」咯，叮！

關愛基金盛名之下，其實難副，反映過去歷屆港府一貫對扶貧毫無承擔，責任卸得就卸。嗱，唔怕少年窮，就怕老來苦，隨着人口日益老化，貧富差距不斷擴大，打工仔退休後老無所依、老無所養嘅情況愈來愈嚴重。呢個結構性問題，根本唔係派發一次性租金津貼、加多幾百蚊長者醫療券呢類措施可以解決。

打工仔都有後顧之憂，光靠關愛基金小修小補無濟於事，只有設立全民退休保障制度至可以標本兼治，社會亦早有共識。弊在歷屆政府一於少理，將全民退休保障計劃束之高閣，連討論都慳番。

一萬年太久，只爭朝夕！據講當局遲啲會有類似「全民退休保障」嘅政策出台。太一叮希望呢次唔好再令市民失望。解決安老問題，官老爺可以等，普羅打工仔唔等得，全港幾十萬公公婆婆更加唔等得，叮！