政壇：搞搞政：爭做立會主席袋巾傑自暴其短

競逐連任立法會主席嘅建仔曾鈺成同公文袋黨魁「袋巾傑」梁家傑尋日進行選前論壇。雙方陣營壁壘分明，泛民主派集中攻擊曾鈺成上屆會期尾時「剪布」嘅決定，建制派就不斷質疑如果袋巾傑一旦當選，會唔處理「拉布」問題，任由激進泛民癱瘓議會。

袋巾傑喺開場時就強調會用「兩寬」嘅方式去主持會議，意思係從寬處理議會內嘅發言、寬鬆審批法案、修正案同動議辯論。佢同時又承諾會以「三嚴」原則去做主席，包括約束主席權力，唔運用議事規則冇寫明嘅權力，嚴肅捍衞議會尊嚴，同埋嚴厲要求政府全面直接回應議員提問。

曾鈺成隨即取笑袋巾傑，話對方咁講好危險，代表袋巾傑認同可用灰色地帶調節鬆緊度。佢強調自己處理任何立會事務，都只會跟足規矩去做，除非修改議事規則，否則佢依舊會好似上屆會期尾咁，批准議員提出過千條修正案。

此外，曾鈺成在論壇上亦再次被問到係唔係共產黨員，首先提出呢個問題嘅竟然係廠商會議員林大輝。曾鈺成就話，特首梁振英亦答過自己唔係共產黨員，但外界一樣質疑佢，為咗唔想跌入語言陷阱，呢個問題都係唔會再答喎！