政壇：台積電老闆怕遲到棄座駕

尋日睇報紙，竟然有人因為搭集體運輸鐵路而上報紙，佢就係台積電董事長張忠謀。張忠謀另一個身份係「台灣半導體教父」，大有錢佬，何解有私家車唔坐，改搭集體運輸鐵路？話說佢早幾日要參加公司股東會，但因為路面交通擠塞而遲到，搞到非常之尷尬，佢後來知道由科學園區搭電聯車到高鐵新竹站只需要兩、三分鐘，唔鍾意遲到嘅佢就改用平民方式，搭公共運輸工具。除咗搭電聯車避遲到，張忠謀為咗近返工，仲已經搬到新竹高鐵站附近，可謂為咗唔遲到而出盡法寶。

呢張相係一個乘客拍嘅，然後上載喺facebook，即刻引嚟大批台灣民眾討論，而呢件事亦喺尋日嘅台灣報章顯著版面見報。最搞笑係張忠謀隔籬坐咗位「頭dup dup」掛住睇書嘅女孩子，明顯唔知坐喺隔籬嗰位係乜水，網民當然好多嘢講，話呢位少女如果識得趁機請教吓張忠謀，好過揸住本書讀喇！