新界鄉議局主席劉皇發喺今屆立法會選舉，斗零都冇使過就自動當選，佢嘅前富貴黨黨友、同樣自動當選嘅批發零售界議員方剛，就申報用咗九萬幾蚊，超過四分一用於選舉聚會，首先參加「報名團」陪佢報名，即可獲西餅一件，投票當日再有「謝票團」，六十人食咗二萬五埋單。不過無論攞餅定食飯，原來都要開名，因為方剛連團員名單都向選舉事務處申報埋，透明度相當高。
據聞方剛申報得咁謹慎，原因係上屆佢曾經唔小心漏報咗少少選舉開支，結果搞到畀廉署請飲咖啡，所以今次就巨細無遺乜都報晒。