政壇：飲食界才俊齊嘆難請人
匯聚業界才俊嘅「稻苗學會」日前舉行新一屆執委就職禮，叙福樓集團執董Simon黃傑龍冧莊做主席。當日飲食界猛人雲集，席間話題離不開傾吓最低工資擬加到三十元，稻香集團主席鍾偉平大嘆無奈，擔心咁樣會產生漣漪效應，連帶中高層同事都要加薪，但最令佢頭痛仲係有工無人做。佢直言集團過去一年有成六百多個空缺，肯畀錢都請唔到人。
經營酒樓嘅胡珠都嘆皮費愈來愈重，幸而今年「仲頂得住」，明年就要加價百分之三至五嘞。Simon都嘆飲食界青黃不接，後生仔嫌辛苦唔願入行，請人難過登天，促請政府考慮將部分工種引入外勞。
將重出江湖任某機構高層嘅民政事務局前常秘尤曾家麗都亮相熱身。見尤太清減咗，原來過去兩年佢勤力行山，眨眼減走四磅肉，人都精神爽利。
尤曾家麗（右）成功瘦身四磅，消委會總幹事劉燕卿（左）都讚佢有毅力。