政壇：高永文民望高壓力大

現屆特區政府管治團隊上任三個幾月，事故一單接一單，既要清除上手煲呔曾留低嘅地雷，又要應付一啲既得利益團體同傳媒集團嘅無理攻訐，搞到班問責官員每日都如履薄冰。

推醫保料有爭議

就以德育及國民教育科一役為例，一嘢就將深受市民擁戴嘅政務司司長林鄭月娥嘅民望，好似玩跳樓機咁跌咗一大截。另一民望高企問責高官，食物及衞生局局長高永文就相對好啲，民望仲可以保持咁上下，但佢尋日接受訪問時形容，自己雖然民望高，但其實成日都好擔心，怕自己未必時刻可以達到市民期望，夙夜憂嘆之下，令自己亦好有壓力。

換着其他人咁講，可能會畀人話係講「風涼話」，但出自高永文把口，相信就唔會有反效果。查實佢都唔使咁擔心吖，香港市民眼睛係雪亮嘅，一定可以睇得出邊個係真誠為香港，有能力、有決心服務市民，就好似上任後發生幾單突發事件，包括中東爆發神秘病毒、十．一海難醫療搶救工作，甚至最近嘅醫學美容集團涉嫌提供會引致死亡嘅療程等，幾單嘢佢表現恰如其分，要硬淨時夠硬淨，甚至即時回應唔排除會立法規管，反應咁快，迅速釋除坊間疑慮之餘，亦令到自己民望不斷攀升。

雖然表現唔錯，但佢並冇沾沾自喜。高永文喺訪問度亦話未來推行自願醫保，甚至發牌監管私營骨灰龕等政策都一定會引發爭議，政府絕對唔會低估難度。有能力、有遠見，又可以認清形勢，佢民望高係有原因嘅，只要唔好得意忘形，其實唔需要咁擔心吖！