敬老扶貧非派糖 唔該政客咪再玩

「嗷嗷待哺」呢個成語相信大家都知點解，就係形容一個人飢餓哀號，亟待救濟嘅悲慘樣子。咁「熬熬待哺」又點解呢？嗱，如果大家諗唔到，睇吓班老人家就一清二楚嘞。

由於前朝政府刻薄寡恩，搞到香港班老人家老無所依，晚景淒涼，咁多年嚟都無啖好食。唔講咁遠吖，大批公公婆婆捱更抵夜通宵排隊，就係為咗一盒節衣縮食「四蚊飯」，熬熬待哺嘅迫切程度已經一目了然啦。

好嘞，前朝政府終於散檔，當局撥亂反正，推出俗稱「特惠生果金」嘅長者生活津貼，計劃向四十萬名合資格長者每月發放二千二百蚊，班老人家諗住終於都有一餐安樂茶飯啦。哈，點知有政客為反而反，堅持要廢除資產審查門檻，如果唔係就一拍兩散否決法案。特惠生果金隨時落實無期，對呢班貧困長者嚟講，係咪心急如焚先？老人家亟待打救，已經夠慘，家陣仲要飽受擔心好夢成空嘅精神煎熬，呢種淒涼處境咪叫熬熬待哺囉，叮！

嗱，勞工及福利局局長張建宗係咁講嘅，政府未來一星期會公布特惠生果金嘅措施細節，並向立法會提交文件，強調資產審查門檻寬鬆，唔會對長者查家宅。政務司司長林鄭月娥亦強調，公帑要用得其所，如果特惠生果金廢除資產審查，唔符合香港整體利益。

唉，行政立法角力，最無奈就係班老人家，特惠生果金隨時淪為政治鬥爭嘅犧牲品。廢除資產審查，人人有份，聽落梗係好啦，但係知易行難，庫房承唔承受得起先？如果連腰纏萬貫嘅富豪都照樣可以個個月攤大手板出厚糧，社會又係咪接受先？萬一拗到天光都未成事，特惠生果金因而拖延難決，甚至觸礁翻船，班老人家真係多得班政客唔少咯！

叮佢個鎯鎯，現今社會愈嚟愈政治化，港府又弱勢，政客眼見同政府唱對台有市場，所以肆無忌憚玩嘢囉，連特惠生果金都唔放過。開講都有話啦，十鳥在林，不如一鳥在手，對嗷嗷待哺嘅老人家嚟講，一樣o架咋，十「果」在林，不如一「果」在手，特惠生果金盡快到手，以解燃眉之急，方為上策。

一句到尾，人在做，天在看，邊個真心為老人家做實事，邊個為個人出位犧牲老人家福祉，市民心中有數，政客好自為之啦，叮！