SUN熱辣：激起仇富心態隨時爆排華潮

歐債危機陰霾未散，內地富豪卻銀彈攻歐，情形猶如當年成吉思汗遠征歐洲的翻版。經濟學家指，由於歐洲經濟持續疲弱，加上近年紅酒產品在內地大熱，富豪紛紛變成「錢吉思汗」，狂掃當地的土地、豪宅、酒莊，期望在歐洲市場分一杯羹。但有熟悉國際關係的專家則警告，內地富豪「攻城略地」之舉，隨時惹來當地人的仇富排外心態，影響中歐關係。

歐豬五國變掃貨熱點

「喺全球金融危機下，呢幾年歐洲嘅債務情況一直冇改善，好多小型公司因為資金短缺，銀行又閂水喉，最終要賤賣資產。另方面，內地經濟起飛，啲有錢人眼見嗰邊有平貨賣，梗係唔執輸去執平貨。」經濟學家關焯照表示，「歐豬五國」是內地富豪的掃貨熱點，包括愛爾蘭、西班牙。

「呢幾個國家嘅國債情況最嚴重，最多平貨賣。而近年內地人鍾意飲紅酒，甚至掀起炒酒熱潮，國內對酒嘅需求好大，所以除咗買屋、買地，富豪仲會投資酒莊。其中意大利同法國有好多酒莊，特別受歡迎。」

香港國際問題研究學會研究員梁建勳認為，縱然長期以來，內地與歐洲多國關係平穩，但內地富豪以龐大資金買起歐洲資產，難免會引起當地人不滿。「見住自己嘅嘢被人買咗，而自己又享受唔到，邊個會鍾意呢？喺法國、西班牙呢啲比較多華人住嘅地方，都有唔少排華情況。」他補充，歐洲部分二線國家，如波蘭、捷克，當地人的生活水平更低，仇富與排外心態更為嚴重。