政壇:搞搞政:經民聯成形變「經脈亂」?

工商專業聯盟喺上屆立法會發揮嘅作用有限,經濟動力等人吸取教訓後最近進行重組,易名為香港經濟民生聯盟,簡稱經民聯。

經民聯由經濟動力三子、專業會議梁美芬同石禮謙、金融服務界張華峰同工程界盧偉國七人組成,當中五人都有職位,主席係工業界梁君彥。

細睇經民聯嘅組成,好似係集百家之大成。首先七人當中有五人,包括林健鋒、梁君彥等都曾提名唐英年,最令人意想不到嘅係,經民聯尋日成立時仲有多名前唐英年競選辦公關現身幫手,儼然由唐營做骨幹;其次經民聯用埋建仔成日掛喺口邊嘅「是其是,非其非」話語,難怪有人為經民聯改花名為「經脈亂」,甚至「經紊亂」啦!

手握七票嘅林健鋒有望更上一層樓做行會成員,但佢重申唔會用七票搵任何職位。梁君彥則指特首選舉後不分唐營、梁營,強調香港只有一個合法政府,第時經民聯每件事都會拎出嚟傾,不過唔會綑綁投票。究竟經民聯會否變成「經脈亂」,講就原則多多但做就事事支持政府,大家要拭目以待喇!

第一手消息請下載on.cc東方互動iPhone/iPad/Android/Windows Phone Apps

設計圖片及對白