早前盛傳候任立法會旅遊界議員姚思榮會加入經濟動力或早餐派，但佢話同建制派議員個個都熟，所以寧願保持獨立都唔想得失任何一位老友喎。
姚思榮話自己喺旅遊界打滾多年，同富貴黨嘅旅遊業議會前主席何栢霆同旅議會總幹事董耀中等人老友鬼鬼，所以喺議會內都揀咗坐喺富貴黨隔籬方便照應。而讀漢華中學嘅佢同師兄葉國謙相交多年，所以同建仔都算係叫做有啲交情，再加上佢同金融界吳亮星、航運交通界易志明都係中國國家行政學院（香港）工商專業同學會校友，為免順得哥情失嫂意，咪邊個派別都唔入囉。