政壇：田二少選區蕩失路

新民黨成立短短兩年時間，九月立法會選舉贏到兩個議席，成績算係有交代，其中喺新界西勝出嘅副主席田北辰（田二少），其實早喺兩年前已喺新界西部署，吸納獨立區議員入黨、喺各區分配資源同人手等等，總之兩年來出入新界西次數就多不勝數啦。不過熟還熟，但二少仍然係唔熟路，日前原本要入屯門某間酒店參加黨嘅集思會，點知竟然揸車去咗大嶼山。

集思會遲大到

眾所周知，二少係大型服裝公司老闆，平日出入都有司機接送，自己揸車嘅機會相對唔多。據講，佢前日揸揸吓車入屯門，期間發現唔多妥，即時四圍打電話問路，可惜最終都係神仙難救，揸咗入大嶼山；大嶼山同屯門，兩個地方雖然同屬新界西選區，但距離就真係離天百丈遠，入咗大嶼山嘅二少雖然最終亦成功搵到路兜番去屯門，但就搞到遲晒大到，令到身為新民黨副主席嘅佢尷尬萬分。

出席集思會遲大到，二少到場時一臉尷尬，為咗賠罪，除即場向各位兄弟姊妹道歉外，當晚仲請晒全世界食消夜，總算係識做兼大方啦。

講番新民黨個集思會，今次出席人數有成三十幾人，陣容都幾鼎盛，一向致力爭取中產票嘅二少對呢區應該熟到爛，點知平日司機接送嘅佢，一自己揸車就蕩失路，幸好唔係居民大會或者地區活動，否則得失晒班中產就麻煩喇！