大學雞發爛渣 又冷血又可怕

古人話後生可畏，其實計太一叮話齋，後生唔只可畏，簡直可怕添吖。呢，日前南丫島發生世紀海難，死傷枕藉，消防、救護、飛行服務等救援隊伍爭分奪秒搶救生命，點知有人竟然發爛渣大罵消防員，簡直匪夷所思！

件事係咁嘅，海難發生第二日凌晨，有位中文大學一年級男生喺鳳凰山山頂報稱肚痛，打電話報警求助。當時雖然人手緊張，當局仍然派出消防及救護員上山救人，點知當救護人員幾經辛苦行咗兩粒幾鐘搵到該學生時，佢居然不滿飛行服務隊冇派出直升機送佢到醫院，喺落山途中發爛渣抓傷消防員塊面，仲好似細路仔咁瞓喺地上唔願行，大叫「我一定要直升機幫我」！

喂，肚痛啫，行得跑得嗌得打得，點解一定要搭直升機呢？你估你真係大爺咩？難得消防員好有耐性咁同佢解釋，話直升機正喺南丫島海難現場搜救，分身不暇，佢居然話，「失蹤嘅人都死梗，點解要派機去搵死屍，而唔幫我呢啲活生生嘅人？」堂堂大學生蠻橫及冷血成咁，你話佢仲有冇人性吖。

唔講唔知，太一叮一直以為香港只有小學雞，原來仲有大學雞。有網民笑呢位大學雞只係想搭直升機，借啲意詐肚痛。其實，佢唔只詐肚痛，簡直係無理取鬧至真。嗱，納稅人畀錢搞教育，居然培養出咁嘅大學雞，都唔知究竟係教育嘅悲哀，定係納稅人嘅悲哀。老實講，派直升機去搵死屍，直情好過救呢啲活生生嘅人渣喇，係咪！

雖然話，呢位無理取鬧嘅大學雞可能只係個別例子，但正所謂見微知著，依家嘅年輕一代實在令人擔心o架。大家都知道，香港曾經係一個和諧、包容、理性嘅社會，人人發揮獅子山精神，守望相助，互相扶持，先至可以咁成功。可惜近年社會愈來愈政治化，愈來愈偏激，愈來愈反智，唔少青年人以自我為中心，自私自利，自以為是，完全唔識得包容，唔識得聽取他人意見，搞到成個社會烏煙瘴氣，亂七八糟，再咁落去，香港仲邊有未來吖，唔擔心就假！

講開又講，呢次南丫島世紀海難雖然死傷慘重，令人悲痛，但亦見到人性光輝一面，喺災難面前，香港人嘅團結及勇敢實在令人感動。太一叮只係希望，好像呢位淨係識得發爛渣嘅冷血大學雞，唔好再出現第二個嘞，叮！