SUN奇古怪：Sun潮語【廢渣】

十.一海難之後，社交網站上有很多哀悼留言。當中很多被指抽水，例如有啲人話國慶唔應該再放煙花，又有啲人指摘中聯辦官員唔應該出嚟說三道四。當然至抽水都係某啲國內傳媒，話中國搜救隊積極參與整個救援工作。有啲政客喺出事第二日已經急不及待去　港燈傾賠償，救援都未完成就走去博上鏡，真係無恥到極點。

不過最無厘頭，係一位自稱虔誠基督教徒喺網上嘅留言，話因為成日搞示威，破壞香港祥和，所以引致天譴要用海難懲罰世人云云，呢個留言即刻網上被廣傳，仲被全城網民怒罵「廢渣」！

「廢渣」係近期一個網上潮語，意思係話一啲人嘅品格和水平低到連人渣都不如。「渣」即係渣滓，無任何價值。「廢渣」即係「廢」嘅「渣」滓，即係無用之中嘅無用，攞去堆填都會擔心污染環境，對人類構成威脅。亦都有說話「廢渣」其實係「廢物渣滓」嘅縮寫，如果以廢嘅程度去理解，應該係廢嘅渣啱啲。

要去到「廢渣」嘅地步，都唔係咁易。你諗吓，要將一場40年來最大海難同近日嘅示威掛鈎本身已經唔係正常人諗得出，但偏偏網上世界有大把呢類腦部發育不正常嘅「廢渣」，不斷發表駭人聽聞嘅膠論。

「廢渣」亦唔係只局限於網上，現實生活都唔少。好似某啲腦殘高官，被指經營劏房，就推個老婆出嚟受，一波都未平之後仲要知法犯法酒駕，毫無政治敏感度，納稅人每個月出幾十萬糧畀班「廢渣」，唔嬲就假！