政壇：搞搞政：建制報舊仇追殺何秀蘭

建制派同泛民主派就內會正副主席人選取得共識，主席會由經濟動力梁君彥擔任，而副主席就由工黨Cyd何秀蘭等三名泛民議員角逐。話說尋日泛民飯盒會原先會由眾人投暗票決定邊個做，點知白鴿黨劉慧卿就引述負責協調嘅建仔葉國謙話，唔少建制派講明唔想阿Cyd做，又揚言如果泛民堅持要派阿Cyd出戰，佢哋會不惜冒住畀人話無道義嘅風險，都要派人出選攞番個位，究竟當中有乜恩怨呢？

有傳聞話建制派或工聯會眼見工黨勢力日益壯大，而阿Cyd身為工黨一員，如果再做埋內會副主席的話，勢力同風頭將進一步坐大；加上○三年區選時，佢喺中西區區會觀龍選區打贏葉國謙，搞到雙方誓不兩立，估計有人趁今次選舉出手報仇都唔出奇。

據了解，泛民聽到對家咁講真係嬲到震，又話原則性問題冇妥協餘地，又話泛民應有自主權決定派邊個出戰，有乜理由可以被建制派幫佢哋揀埋人選喎！