政壇：鍾國斌遲大到焗做「保安」
富貴黨立法會紡織及製衣業界議員Felix鍾國斌話，自己除有興趣加入環保同工商事務委員會外，仲被「欽點」加入保安事務委員會。佢講笑話，自己對保安事務一無所知，可能身形健碩似足「阿sir」，所以先畀人誤會佢有豐富保安經驗喎！
Felix憶述，當日因為有其他工作而遲大到，當佢上氣唔接下氣咁趕到時，黨團會議都差唔多開完，一去到就有人話已安排咗佢去保安事務委員會幫手，又話其他委員會已畀人揀晒。佢好無奈話，佢對保安事務一無所知，但都會虛心跟其他人學習嘅；佢又透露，雖然工作愈來愈多，但仍然堅持每日做「柴可夫」揸車送十五歲囡囡由西貢去香港仔返學，真係廿四孝爸爸。
鍾國斌因為黨團會議遲大到，被「欽點」加入保安事務委員會。（資料圖片）