政壇：發叔連任斗零唔使

立法會選舉結束就快一個月，候選人陸續向選舉事務處遞交選舉開支申報。尋日率先提交嘅係喺傳統功能界別自動當選嘅議員，當中代表新界鄉議局嘅劉皇發就最「慳家」。

葉國謙象哥大花筒

點解咁講？事關發叔喺冇競爭對手下自動當選，喺成個選舉一毫子都冇用過就贏咗個議席返嚟，成功再度連任。除咗發叔之外，代表工業總會嘅梁君彥亦認真節儉，只係用咗四千一百六十元，但梁君彥實際上只係出咗一百六十元，當中包括三十元嘅晒相錢同一百三十元選舉代理人嘅交通費。另外嗰四千元邊個畀呢？其實係選舉代理人同助理嘅人工，但梁最後得到選舉代理人捐贈，變相唔使畀，睇嚟梁君彥嘅代理人都幾抵得諗。

相反，喺尋日供查閱嘅候選人開支申報中，以建仔葉國謙同「象哥」黃定光最大花筒，兩人雖然分別喺區議會（第一）同進出口界自動當選，但係都各自用咗六萬幾同四萬多元，當中兩人都各用八千七百多元影選舉宣傳相，真係貪靚。不過佢哋有建仔找數，所以使幾多都冇有怕啦。

其實喺功能界別自動當選嘅議員當中，有幾個都有「大水喉」射住。好似喺金融界當選嘅中銀高層吳亮星，喺成個選舉用咗一萬二千三百六十九元，全數都係由中銀（香港）捐贈。而代表中華總商會當選嘅廖長江，選舉就用咗一萬一千七百一十八元，而當中兩場共花費二千多元嘅傳媒茶敍就係中總埋單o架喇！