港人港地阻力大 無殼蝸牛上車難

內地客財大氣粗，來港掃貨早已唔限於名牌，掃豪宅先係身份象徵。有團體調查發現，近月開售嘅兩個大型樓盤，內地買家佔咗兩成。有呢班內地豪客撐住，本港樓市想唔升都幾難，無殼蝸牛想有瓦遮頭咯喎，睇怕真係要求神拜佛中六合彩先至得。

呢，最近將軍澳及沙田兩個樓盤開售，發展商為咗爭取內地豪客，唔止喺內地大做宣傳，仲提供種種促銷優惠，結果成功招徠兩成內地買家。樓價亦水漲船高，發展商固然賺到盆滿缽滿，但基層市民想「上車」就一日難過一日。正如團體話齋，內地富豪購買力實在太強，就算港府增加幾多私人住宅供應，推出幾多穩定樓市招式，樓價依然居高不下，當局有必要擴大「港人港地」政策，協助港人置業，更有人建議應限制內地人來港買樓添。

其實，自由市場係香港嘅根基，歡迎八方來客前來購物消費，買樓都係其中嘅一種，如果一刀切禁止內地人來港買樓，接住係咪要限制佢哋來港買化妝品、買名牌、買豉油或者衞生紙？呢樣禁買，嗰樣禁購，咁香港係咪要走回閉關鎖港嘅年代？咁仲算係乜嘢自由市場？再講啦，只禁止內地人買樓，唔禁止外國人買樓，咁算唔算係歧視？己所不欲，勿施於人，如果內地人亦要求禁止香港人喺內地買樓，香港人又會點諗？

講真，公屋、居屋不嬲都係只畀本地永久居民租用或購買，都算係「港人港地」，今後市建局建造嘅樓宇亦可納入呢個範圍。一句到尾，解決房屋問題都係要增加土地供應，多建公屋及居屋，仲要係確保質量之下，愈快愈好。新政府提出研究縮短公屋興建年期，加快輪候人士上樓，又強調盡快推出居屋貨尾單位，覓地復建居屋，方向完全正確，不過咁，千祈唔好學前朝政府得個講字，講完就算數呀！

話時話，「港人港地」政策固然事在必行，但推行起來都唔係咁易o架。就講新界東北發展大計吖，預期可以容納十五萬人口，其中港人港地嘅公屋、居屋數量超過一半，點知呢個新市鎮計劃竟然被扣上「割地賣港」、「富豪雙非城」等大帽子，已經公眾諮詢咗三輪嘞，有人仲話唔夠，要推倒重來，問你服未。

叮佢個鎯鎯，香港就係咁，樣樣政治化，乜都吵一大輪，啲政客呢頭要求加快建屋，嗰頭又阻住地球轉，咁搞法，無殼蝸牛想安居樂業，睇怕仲難過上青天，叮！