政壇：政商定格：郭少明盼抱乖孫拉頭馬
沙田馬場每年十月都會舉行婦女銀袋日，今年就揀定十四日供一眾名媛淑女綠茵場上爭妍鬥麗，莎莎國際主席郭少明透露，今年除咗搵到內地紅星擔任形象大使外，仲會喺場內設立化妝專櫃教人扮靚靚，又有公眾投票選出裝扮最佳女士嘅活動。郭少明話，獎項不限於頭三名，進身決賽嘅女士都有安慰獎，真正係皆大歡喜。
郭家千金郭詩慧產後瘦身成功，到時會帶埋六個月大嘅仔仔出席，佢透露，爸爸期望可以手抱孫仔拉頭馬，郭家當日更會出動三匹愛駒參賽。郭少明好有信心咁話，孫兒出生第三日佢就有馬匹勝出，只不過孫仔太細，未適宜拉頭馬。
郭少明繼續同馬會合辦婦女銀袋日，太太郭羅桂珍（左）與女兒郭詩慧屆時會盛裝赴會。