政壇：搞搞政：禮先行陳維安唔怕被蝦

立法會復會在即，秘書長陳維安（Kenneth）上周六已正式上任，成為回歸後第三位立法會秘書長。做過教育局副局長嘅佢經過官場同大機構嘅歷練後，對新工作好有信心，尋日同傳媒茶敍時就講笑，話啱啱卸任秘書長嘅吳文華臨走前都擔心佢會畀新議員蝦，Kenneth卻唔相信議員會特別為難佢，仲會主動去議員辦公室同各政黨總部逐一拜會，先禮後兵好過一上任就出拳。

閒談間，大家都問佢會唔會重返政府，Kenneth唔肯承諾唔會重返政府，只係話希望任內可以見證立法會所有議員由普選產生嘅歷史性一刻，又引用佛偈「放低就係放低」，話離開舊崗位後唔會再講以前嘅事。

議會工作最講究程序，Kenneth透露一早熟讀《議事規則》，嚟緊最大挑戰係要理解立法程序嘅背後慣例同應用原則。今屆立法會增加到七十位議員，對秘書處嘅挑戰好大，因為翻譯部及法律部同事工作量多咗好多，秘書處之後除咗要諗吓星期四係咪要多開半日會外，仲要考慮增聘人手應付需求喎。