政壇：泛民內鬥飯盒會爭做莊
新一屆立法會快將復會，泛民各黨派嘅內部協調問題多多，就連佢哋嘅跨黨派溝通機制「飯盒會」，都出現召集人要打崩頭爭住做嘅情況，由於共識難尋，今屆惟有改為各泛民黨派輪住做莊，即係一黨負責一段時間。「飯盒會」係泛民喺立法會嘅定期接觸機制，原本一直由工黨何秀蘭（Cyd）做召集人，但尋日開會後，佢哋就透露有個新安排，改為公文袋、白鴿黨、工黨、街工及泛民獨立議員分成四組，每組人選各做一年。「飯盒會」尋日亦討論推舉人選同建制派角逐大會同其他委員會嘅正副主席，但除咗決定派出公文袋梁家傑角逐大會主席外，其他委員會都未有共識。
估唔到泛民為咗呢啲雞毛蒜皮嘅嘢花咁多時間去討論，反而討論長者生活津貼議題就未有共識，佢哋有幾關注民生，相信市民都睇得一清二楚。