政壇：烏龍樹根卡片宣傳港獨

新一屆立法會議員嘅任期由本月一日開始，部分議員亦已開始印製新卡片，服務地區二十多年嘅民建聯港島議員鍾樹根（Christopher）前兩日已印好一百張雙面卡片，卡片上有東區區議會主席同立法會議員資料，不過，張卡片錯漏百出，仲好容易被人誤會佢搞港獨！

建仔嘅克勤仔四年前一句「搓our breast」已經出晒醜，依家又輪到喺香港完成咗多個英國大學碩士學位嘅Christopher派出咁多問題啲卡片，佢張卡片上先係串錯咗「Legislative」（立法）寫為「Legistrative」，仲錯咗三次咁多；其次係「Administrative」（行政），就漏寫咗個i字變成「Adminstrative」。

不過，最嚴重嘅係竟然將中華人民共和國嘅英文譯名「the People's Republic of China」 寫為「the People's Republic of Hong Kong」，豈不是變成「香港人民共和國」？到底係疏忽定英文水平出問題呢﹖Christopher話，由於立法會同建仔都冇卡片樣辦畀佢哋抄，所以惟有自己印住啲應酬用嘅卡片，加上佢嘅助理係新人，唔小心串錯字，佢哋知道出錯後，已經立即將整批卡片丟棄。好彩呢款卡片只係印咗一百張，否則就嘥錢兼累事！