政壇：白鴿友賴死阻人發達

新一屆立法會即將開展新會期工作，秘書處亦趁暑假做咗大執漏工程，不過，有好多候任議員都未必可以立刻進駐辦公室、投入新工作，主要原因係有個別上屆議員或要搬辦公室嘅議員賴死唔走，好似白鴿黨嘅涂謹申（阿涂）、甘乃威（甘威）咁，遲遲都未清出間辦公室，呢鋪真係舊人唔急新人急囉！

阿涂同甘乃威呢兩個「遲搬一族」一直拖，到咗尋日都未執乾淨晒舊議員房嘅雜物，搞到公共專業聯盟兩位新立法會議員同教協葉建源唔可以布置新寫字樓。

李國寶疑似搬竇慢吞吞

資訊科技界議員莫乃光話尋日去睇過白鴿黨嘅搬屋情況，佢話阿涂啲嘢已經搬得七七八八，得番小部分雜物尚未清理，而阿涂隔籬房嘅張文光已經一早清理晒成間辦公室等佢哋進駐，所以無理由再去畀壓力人哋。葉建源就話白鴿黨承諾周末前騰出甘威原有間房畀佢，又話新辦事處未請夠人，遲多一至兩日入伙影響都唔大。

另外，原金融界議員李國寶本嚟坐喺七樓最尾嗰間議員辦公室，新主人係旅遊界新立法會議員姚思榮，不過，姚思榮尋日投訴李國寶遲遲都未通知佢可以幾時搬入，又話自己九月尾曾經去睇過房，但當時李國寶嘅助理同佢話，唔可以即時畀間房佢，結果姚嘅助理要留喺舊寫字樓辦公。

不過，秘書處稍後回覆就話，李國寶其實喺上月尾前已經搬走，可能對方無通知姚思榮交吉時間，加上秘書處進行後期清潔工作，所以搞到姚思榮等耐咗，又話已經即時通知姚思榮可以隨時搬入去喎。立法會喺下星期三就會召開首次會議，希望所有議員到時可以齊集新大樓辦公，唔使畀人阻住搞到做唔到嘢啦。