與其反對個人遊 不如參與審批權

嘩嘩嘩，中秋節撞上十一長假，十九年至有一次，史上最長嘅黃金周係內地同胞湧港掃貨嘅大日子。旅遊業議會預計，今個黃金周將吸引一百萬內地旅客訪港，打破歷年紀錄，帶嚟最少四十四億元旅遊收益。所以話，黃金周真係名不虛傳o架，的的確確為香港帶嚟金山銀山，「錢途」無限。

不過咁，水能載舟，亦能覆舟，黃金周固然可以帶動本港經濟，令多個行業受惠，問題係咁多人要食、要住、要行、要玩，彈丸之地嘅香港可唔可以承受得起呢？唔講唔知，單係今年上半年，訪港內地旅客已超過一千五百萬人次，足足係香港人口嘅一倍，都咪話唔誇張。難怪有人慨嘆，尖沙咀廣東道已經「淪陷」，上水站也唔再係香港人「主場」，擔心再係咁落去，整個香港遲早會被內地旅客逼爆咁話。

講句公道說話，內地開放個人遊，出發點都係為香港好。試諗下，如果冇咗個人遊，香港經濟可唔可以咁快從沙士谷底起死回生？旅遊業呢條支柱仲撐唔撐得住？失業率係咪可以保持低水平？再講吖，香港係自由港，歡迎世界各地旅客，無可能淨係將內地客拒之門外o架，係咪？

老實講吖，同一家人都會有拗撬，何況中港兩地生活習慣唔同，價值觀唔同，融合期間產生摩擦，不足為奇，只要大家多啲溝通，互諒互讓，其實問題不難化解。最弊係前朝貪曾政府無視香港承受能力，對雙非、水貨客等亂象坐視不理，仲一味向北大人伸手要求擴大個人遊，終於搞到兩地矛盾激化。雖然新政府叫停雙非、擱置一簽多行、大力打擊水貨客，但係社會愈來愈政治化，中港矛盾愈演愈烈，日日家嘈屋閉，睇嚟短期之內都好難解決o架喇！

講開又講，有矛盾梗係要解決，一味反對個人遊，郁啲就攞面港英廢旗出嚟抗議，根本無補於事。有人提議，港府可以與內地建立機制，雙方商討每日個人遊名額，又或者喺開放某些城市人士來港前，內地先與港府溝通，讓港府參與審批。冇錯喇，個人遊最大爭議，正正因為審批權由內地政府話晒事，香港完全係被動接受，如果港府能夠參與審批，就可以有效控制內地旅客入境人數，問題自然迎刃而解。

點講都好，個人遊對香港利多於弊，得大於失，過河拆橋或者因噎廢食點都講唔通。中港融合係大勢所趨，與其爭拗不休，不如實事求是，建立長效溝通機制，總好過成日嘈喧巴閉喇，係咪！