政壇:搞搞政:工聯老將焗用電腦產品

依家用智能電話、平板電腦等科技產品做嘢同溝通都好普遍,但並唔係所有政治人都適應,好似工聯會三位資深議員,包括「超級區議員」陳婉嫻、黃國健同三屆議員「阿王」王國興,據講佢哋唔係咁常用啲資訊科技產品,至今仍習慣印晒啲文件出嚟,逐張逐張慢慢睇。

據講有次工聯會開會時,某位老將投訴收唔到文件,班職員登時嚇一跳,心諗冇理由吖,明明一早發晒電郵㗎,最終調查發現係嗰位老將冇睇電郵囉。又有一次開會,班後生開完會後,夾埋一齊力勸阿王買番部平板電腦,皆因睇文件可以放大縮細,兼且唔使用咁多紙。據聞阿王聽咗十幾分鐘後,終於施施然答話:「我有買㗎,不過擺喺屋企之嘛!」即係冇用囉。

聽聞工聯會三名立會新丁近日同幾位前輩開會時,就反覆要求對方要用多啲資訊科技產品,方便溝通同處理文件,但前輩似乎有啲抗拒,呢個議題分分鐘引發新、舊人之間嘅角力戰都未定。

第一手消息請下載on.cc東方互動iPhone/iPad/Android/Windows Phone Apps

設計圖片