政壇：慷慨黑英獻「薪」助學
天文台前台長「黑英」林超英平時生活為環保乜都慳，但培育未來棟樑就一啲都唔慳，事關佢將依家喺中文大學教書份人工，全部捐晒出嚟做獎學金，閒時又請學生食午餐，上堂又會派糖畀學生打氣，佢仲話唔使擔心份長俸唔夠使喎。黑英又話依家政治氣候改變咗，公務員冇名冇利，政府需要穩定，員工嘅士氣亦要穩定，做管理層最重要係以身作則。尋日遇到黑英兩公婆由灣仔坐渡輪過尖沙咀，結婚四十年依然好溫馨，佢話啱啱先放咗個幾月長假去挪威嘅城巿Spitsbergen，老婆仲親手喺longyearbyen（朗伊爾）掘咗塊樹葉化石返港，又去咗睇冰川、冰山同海冰，佢話今年嘅海冰得番好少，地球會變得更熱，所以佢呼籲大家減少消費，買少啲嘢，佢都身體力行唔買嘢，將購物重任交晒畀老婆打點！
林超英同太太搭船過海，環保又浪漫。