政壇：大舊阿Paul外遊叉電
好多候任議員都趁立法會復會前外遊充電，一直喺議會進行激烈抗爭嘅人民力量「大舊」陳偉業就外遊兼頌親恩。大舊喺社交網站上載同媽媽喺加拿大嘅合照，佢感嘆話已多年冇同媽媽共度中秋，好多網友都對大舊出外充電不忘頌親恩讚好，更有網友幫口話，希望大舊嘅媽媽明白大舊嘅無奈，並祝福佢哋盡情享受天倫之樂喎。
除咗大舊之外，今年成功轉戰地區直選嘅Paul謝偉俊早前就同朋友去咗桂林陽朔玩。阿Paul話，其實今次已非首次到桂林旅行，由於當地風景太靚，加上有位相當好客而且十年前已到當地做生意嘅港人朋友，所以決定到當地盡情休息，之後返港再搏殺過。