政壇:象哥張華峰勢爆磅

大閘蟹當造嘅季節即將來臨,又係時候約埋三五知己一齊擦蟹喇!眾所周知,進出口界議員「象哥」黃定光係大閘蟹愛好者,原來佢喺新一屆立法會亦有同好,就係噸位十足嘅候任金融服務界議員張華峰。唔知象哥同張華峰兩個大閘蟹愛好者短兵相接,邊個先係立會大閘蟹「一哥」呢?

同鄉三分親

張華峰喺剛過去嘅立法會選舉期間,一度減咗幾十磅,但隨時可能反彈增磅。講緊可能令佢增磅嘅「元兇」就係大閘蟹,據聞佢過去都有同財經版記者以呢個方式聚會,平均每次食五隻大閘蟹,適逢今年成功殺入立會,佢話計劃搵埋政治版嘅老友記一齊食大閘蟹喎!

按照張華峰呢個食量去計算,如果分開兩次食大閘蟹,佢夾埋已經食咗十隻,呢條數認真襟計。話時話,象哥每年都食唔少大閘蟹,唔知張華峰會唔會有機會同象哥同場較量呢?不過無論象哥同張華峰大閘蟹嘅食量誰勝誰負,可以肯定嘅係兩人都增磅在望,睇怕都要有心理準備諗計減磅!

講開張華峰,不得不提佢「真正福建人」嘅身份,而且人前人後仲深得同鄉支持同認同。話說佢早前出席活動時,撞到同為閩籍嘅科技大學副校長黃玉山,當時黃玉山二話不說走上前祝賀佢當選立會議員,雙方之後又互笠高帽大讚對方,前者謙稱對方係「學長」,後者疑似為科大「賣口乖」,稱會選擇喺科大讀EMBA喎,引證咗「同鄉三分親」果然此言非虛,二人嘅言行舉止都謙讓非常!

第一手消息請下載on.cc東方互動iPhone/iPad/Android/Windows Phone Apps

設計圖片及對白