免費報霸道擾民 治亂象切勿手軟

水貨客攻陷香港，逼爆北區，搞到居民怨聲載道，要齊齊出嚟「光復上水站」。其實，講到阻街擾民，有一樣嘢有過之而無不及，就係淫賤《爽報》等幾份免費報紙濫印濫派，搞到烏煙瘴氣，亂七八糟。

本報記者視察多個免費報派發點，發現多個港鐵站出口、商場門口同行人通道都被免費報「盤據」佔領，唔止報紙報架堆積如山，派報秩序更加混亂不堪，搞到繁忙時間成日「大塞人」，居民返工返學備受滋擾，苦不堪言。

嗱，免費報通街派，「霸道」阻街，對居民造成滋擾唔在講，最令人擔心嘅係，萬一發生火警或其他意外，隨時釀成人疊人甚至人踩人慘劇，後果可大可小！仲有呀，好多老人家四圍排隊攞免費報，唔係攞嚟睇，而係攞嚟當廢紙賣，結果堆到上屋企天花板，一旦火警隨時燒通頂，唔止害到自己，更加隨時害埋隔籬鄰舍。

即係咁，《爽報》鹹濕淫賤教壞細路，早就有口皆「悲」，而免費報阻街擾民潛藏殺機，一樣搞到怨聲載道，當局唔係又隻眼開隻眼閉吖嘛？咪話太一叮唔提醒，點解上水站被水客攻佔呀？咪因為前朝政府疏於執法，姑息縱容囉！如果當局唔想大街小巷成為淪陷區，唔該快快諗計，整肅免費報亂象！

講開又講吖，免費報禍患無窮，何止對社會造成滋擾，更加對地球造成破壞。係人都知，免費報粗製濫造，內容空洞，根本冇嘢好睇，好多人通常呢頭攞完，嗰頭轉手就揼落垃圾桶或者賣畀廢紙回收商。你話嘞，免費報濫印濫派，係咪等於製造垃圾吖？咁搞法，地球先生唔病到五顏六色至奇啦。

所以話啫，「免費」話就話唔使錢，但係阻街擾民、浪費資源、破壞環境甚至構成安全隱患，呢啲社會成本根本無法計算。唔怪得有人話，免費報有百害而無一利。學者就講得啱嘞，免費報已經氾濫成災，如果再有多幾份免費報推出市場，後果不堪設想，執法部門認真要未雨綢繆，撥亂反正，大家唔想睇到香港淪陷啩！

一句講晒，免費報霸道擾民，治亂象切勿手軟。上水站已經光復咗，免費報淪陷區幾時光復，就睇當局嘞，叮！