SUN奇古怪：Sun潮語【籌期】

最近於facebook睇到一則貼文，內容係關於一班社運人士因被控非法集結，要籌錢打官司。佢哋設計咗張海報，標題係「籌旗」，同時版面設計用咗好多支旗仔。筆者都好明白，香港地搞社運好多時都係窮到褲穿窿，但籌還籌，又唔可以亂咁籌。「籌期」其實係同「旗」無關，「旗」係用嚟扯，又或用嚟冚。「籌旗」正確寫法應該係「籌期」，錢銀攸關，都係認真啲好，「籌期」點可以咁求其？ 「籌期」其實由來以久，係近年先至較為人熟悉，進而成為潮語。

「籌期」意思係籌錢，通常係遇上突發緊急需要，或者屎淋尿瀨嘅情形，先去到要「籌期」。

同普通跑山借錢唔同嘅係，「籌期」所做嘅嘢，好多時係為大眾福利，或出於義氣。有啲人叫呢種募捐行為「搭棚」，其實意思係一樣。都係集資解決燃眉之急，「籌期」過關。

咁點解錢又叫做期呢？點解旗又唔得呢？據筆者所知，「籌期」係應該嚟自監房術語。因為監房嘅工作係以時期做單位，做完一期工種就會調去做另一期工種，例如車衣工作叫「車衣期」、廚房工作叫「廚房期」等，每期有每期糧。如果囚友有需要夾份買嘢，或有人需要其他囚友幫手，就會吹雞集合大家嘅糧期去做嘢，呢啲就係所謂「籌期」。

時至今日，大家食飯AA制又叫「籌期」，同事夾份買六合彩又叫「籌期」，實在有啲濫。「籌期」係一個神聖嘅呼籲。「籌」到嘅「期」係要用得其所，否則大家辛勤工作所得，無私捐畀你原來係用嚟搞埋啲無謂嘢，咁我下期真係唔會再籌畀你！