政壇：搞搞政：怪誕小學雞遊立會

立法會秘書處特登為二十八名新丁議員安排咗兩場立法會大樓導賞團，好多新丁都變成「小學雞」，啲新丁發表嘅意見同問題就千奇百趣，簡直係「怪誕小學雞」。

佢哋尋日先喺會議前廳集合，唔知係慢熱定係大家唔係太熟嘅關係，泛民主派同建制派新丁初次見面甫入前廳已「劃地盤」，泛民新丁攻佔前廳紅地氈區域，建制派就盤據「紅區」以外範圍，驚死踩過界咁。

跟住佢哋入到會議廳，建仔嘅阿Ann蔣麗芸就好緊張會議廳內射燈會照到佢塊臉黃晒，要秘書處職員解釋一番。其他議員就提出好多建議，例如資訊科技界莫乃光建議立法會紀念品應由大學設計，可以畀學生多個實習機會；至於紡織及製衣界鍾國斌仲忽發奇想，建議喺立法會內加建泳池！話覺得自己變咗小學生去旅行咁興奮嘅漁農界何俊賢，就連頭都未梳好就現身，髮尾翹起晒，好似動漫《龍珠》嘅角色咁。