政壇：股神缺席權力女性年會
早個禮拜宣布完成前列腺癌放射治療嘅股神巴菲特，佢助手向外界講，股神聽從醫生建議暫時避免外遊，將會缺席今年嘅《財富》五百大最具權力女性年會，呢個會議股神過去三年都有參加，但為咗休養身體，只好臨時甩底，相信大會都會體諒佢同送上慰問。
講番呢個會議，將於十月一號起一連三日喺加州舉行。今年嘅《財富》五百大最具權力女性排名，榜首係巴西國營石油公司Petrobras嘅舵手福斯特，佢亦係首次登場。喺頭五十大之中，只有三個中國女性，當中兩個姓孫，分別係排十七位嘅華為董事長孫亞芳，排四十一位嘅摩根士丹利亞太區聯合首席執行官孫瑋，另一位係排名三十，格力電器董事長董明珠。