政壇：莫乃光幫電訊商賣廣告？

尋日iPhone 5正式喺香港推出，有某電訊商舉行新機發布會，新當選嘅資訊科技界立法會議員莫乃光（Charles）都去咗襯熱鬧，仲將幾張活動相放上facebook，加埋一句「not my own iPhone 5, yet」（未係我嘅iPhone 5……住），狀甚興奮。不過有人就質疑佢身為候任立會議員，成個代言人咁幫人賣廣告，係咪收咗電訊商錢呀？

Charles向本報澄清，自己只係應邀出席活動，見到成班記者朋友，咪貪得意拎部電話上手影吓相囉。佢既冇上台影相致詞，亦冇收任何報酬，自己想買iPhone 5都係經正經途徑訂購，絕冇打尖換機。再者，佢並非只出席某個牌子或某間電訊商嘅活動，其他公司搞嘅佢都去過，完全無意幫人賣廣告。

佢又強調，作為IT人同IT界代表，自然要出席吓呢類活動，了解吓業界嘅最新行情，否則好快就會out晒，同啲IT界選民冇偈傾。佢仲立即申報自己亦有用其他公司嘅電子產品，形容自己只係一個普通嘅用家同粉絲。