政壇：陳國民助港人願望成真
「家電大佬」德國寶董事長Edward陳國民日前喺一間酒店大排筵席，慶賀公司三十周年同自己牛一，陳太同大女Karen嘉賢、次女嘉慧齊現身，仲有Karen老公馮建輝同兩歲囝囝Kenny，三代同堂好熱鬧。工業總會主席鍾志平等老友喺現場放映惡搞Edward做主角嘅電視廣告，笑爆全場。
身兼提升快樂指數基金會長嘅Edward開心到笑不攏嘴，即場宣布將賓客嘅禮金全數捐出，成立「開心願望成真」專項基金，幫助有需要嘅市民完成有意義、上限為一萬元嘅願望。佢仲話如果禮金唔夠數，就自掏腰包補夠數至三十萬元。此話一出，老友踴躍響應，李錦記集團主席李文達爽快「配對」捐出三十萬元，鍾志平都唔執輸，捐出五萬元。基金義務總幹事陳詠梅話申請者不分年齡、國籍同種族，只要係香港居民就得喇。
陳國民（右三）抱住孫仔Kenny，開心滿足。左一為陳太，右一、二為囡囡陳嘉賢夫婦。