政壇：葉劉拒硬撼阿涂

新一屆立法會即將展開，各個事務委員會成員亦開始大執位，想競逐委員會正副主席嘅人選陸續浮上水面。之前一直盛傳建制派想新民黨主席葉劉淑儀擔任保安事務委員會主席，用以監察同制衡會內嘅泛民主派涂謹申，但葉劉尋日出席活動時坦言，因為有太多同保安相關嘅官員都係佢嘅舊同事，擔心做起嘢上嚟會尷尬，所以都係想競逐公務員及資助機構員工事務委員會主席。

未決定入唔入行會

咦！點解扭軚？唔通驚同阿涂硬碰？葉劉話除保安事務委員會外，佢對其他大部分事務委員會都冇乜興趣，唯獨對公務員事務委員會情有獨鍾。不過，如果佢真係要競逐公務員事務委員會主席，就要先過工聯會同工黨嗰關，所以佢話最後決定要等下禮拜建制派開完會至知。其實佢過去一直係公務員事務委員會主席，可謂做慣做熟，但佢加入保安事務委員會嘅話，無可避免要同以前政府舊同事交手，好就話啫，如果有乜拗撬就會傷和氣。

早喺特首CY梁振英新政府上場時，已傳出葉劉會加入行政會議，佢最終只委任咗建仔李慧琼加入，而其他議員就要有待立法會選舉後再算，如今選舉已過，最新嘅進展如何呢？順利連任立會議員嘅葉劉就強調，要先同CY傾吓，了解依家行會成員需要扮演乜嘢角色至再決定。至於會否擔心加入行會後會同議員嘅角色有衝突，佢強調自己絕對唔係退縮嘅人，亦唔會避子彈，只希望可以提供意見畀政府，協助政府施政喎！