侯志強：賠償合理祠堂送政府

【本報訊】新界東北多個鄉事委員會擔心今日論壇場面混亂，昨率先與規劃署官員舉行諮詢會。上水鄉事委員會主席侯志強表明，如果政府有合理賠償，村民可原區安置，他支持發展計劃。他甚至說：「村內的古廟可以拆掉重建，祠堂亦可送予政府。」

指反對者多非村民

上水、打鼓嶺、粉嶺及沙頭角鄉事委員會昨早舉行諮詢會，規劃署及土木工程拓展署官員到場聽取意見，約六十名村民出席。侯志強說，若有原區安置及合理賠償，不設資產審查，他支持新界東北發展計劃。他又批評部分反對發展的人是別有用心，「有啲人係霸權主義，霸住啲土地，之後等搬遷上樓。」

侯志強表示，今日會到論壇湊熱鬧，但不會發動村民到場，村民自發想參與亦無不可。他說：「唔係人多就得，發動多人又點呢？佢哋（反對發展的人）好多都唔係村民，只係網民，希望佢哋唔好渾水摸魚。」

天平山村村民廖健文表示：「我唔反對發展，但係發展過程中應該善待受影響村民。以前條村冇乜人住，近排多咗咁多人，根本係種釘。佢哋將荒廢嘅雞棚、養魚房改成寮屋出租，或者賣出去，先變咗咁多村民喺度，仲代表埋我發言，掩蓋晒我啲訴求！」

規劃署高級規劃師張綺薇表示已聽取村民意見，會仔細考慮，因新界東北發展影響很多人，政府要研究，若有賠償安排會通知居民。

新界村民意見

古洞村居民黎太：「我屋企有兩個老人家，又有小朋友，有啲人話我哋條村冇乜人住，究竟有冇真正入嚟睇過？村民個個都唔知賠償係點，政府話安置我哋住公屋，我哋超出咗公屋資產審查，依家連車位租金都唔使交，到時點算？」

天平山村居民阮先生：「喺度住寮屋三十幾年，三代都喺村長大，之前業主想嚟收地，根本冇乜賠償，如果畀十萬、八萬蚊係唔合理嘅，依家租金咁貴，搬出去租住，唔夠兩年就冇晒啦。如果政府收地就要安排上樓，有合理安置。」

上水鄉鄉務委員會主席廖先生：「我哋廖氏有幾百萬呎農地受影響，由好多上水圍嘅原居民擁有，如果拎咗嚟起公屋、居屋，咁我哋點算？我哋都係有丁權o架，政府做規劃發展就應該賠地，以地換地。」

打鼓嶺坪洋村原居民陳先生：「我同兄弟有三間丁屋，有兩萬呎花園地，政府喺我哋丁屋邊界發展做特殊工業區，係好影響我哋。希望政府規劃時，剔出我屋企附近範圍，保護我同兄弟嘅丁屋。」