水貨客變陣搬家 治亂忌虎頭蛇尾

好嘢！失落嘅領土終於物歸原主咯！

嗱嗱嗱，大家唔好誤會呀，太一叮唔係講緊釣魚島。鬼咩，內地當局對維護領土主權一向閃縮懦弱，中國人想睇到失落領土完璧歸趙，真係唔知要等到何年何月。太一叮係講緊上水港鐵站，經過港府一場犂庭掃穴之後，水貨活動有所收斂，車站範圍秩序得以改善，居民終於得回一片人間淨土。

政務司司長林鄭月娥係咁講嘅，打擊水貨客行動初步見效，當局會持之以恒，以不定時、不定期、不定點方式出擊掃蕩，希望北區市民生活不再受滋擾。

事實證明，世上無難事，只怕有心人。北區水貨問題雖然根深柢固，但只要當局嚴格執法，全力掃蕩，冇話做唔到嘅。當然啦，如果學前朝政府咁懶懶閒閒，闊佬懶理，上水站梗係淪為港版釣魚島，長期被人非法佔領啦！

新政府全力取締水貨活動，總算行出第一步，當局話會持之以恒，但願講到做到，唔好下巴輕輕呀。你知啦，港產官僚嘅施政特色就係虎頭蛇尾，如果做完大龍鳳之後，上水站又變番行人勿近嘅「水客專用區」，市民一定唔放過你哋o架！

差啲唔記得添，港產官僚仲有另一個施政特色，就係頭痛醫頭，腳痛醫腳，成日顧得頭嚟唔顧得腳。當局肩負為居民保家衞土嘅神聖任務，真係唔可以再懵盛盛o架。嗱，上水站洗完太平地之後，本報發現粉嶺、大埔、太和同大圍港鐵站都驚現水客蹤影，甚至有人猖獗到利用月台拆貨添。即係話，百足之蟲，死而不僵，水貨活動已經開始沿東鐵線擴散蔓延嘞。

其實，當局聯合行動之後，本報發現水客活動變陣運作，唔止租用上水公屋單位作貨倉，更加摒棄慣用嘅手推車送貨方式，以避開執法人員耳目。由此可見，水貨客開始以螞蟻搬家方式，同當局玩貓捉老鼠遊戲，所以咯喎，港產官僚千祈唔好瞌眼瞓呀，打擊行動更加唔可以虎頭蛇尾，以免功虧一簣吖！

話時話，水貨活動影響社會秩序固然要掃蕩，另外一類擾民嘅行為一樣要取締。係乜嘢？咪就係包括淫賤《爽報》在內嘅免費報紙阻街囉，每朝繁忙時段，包括大埔墟港鐵站對出行人隧道等地方例牌因為派報而水洩不通，人車爭路，險象環生，搞到居民怨聲載道。當局快快趣趣出來維持秩序啦，無謂等到居民又發動一場「光復」行動，先至嚟補鑊吖，叮！