政壇：易志明獻計增港鐵效率
自動當選嘅富貴黨立法會航運交通界議員「阿易」易志明，雖然議員任期未正式開始，但佢已好落力見業界人士，佢話未來幾日會同港鐵職員見面，諗住反映吓女士喺港鐵車廂嘅尷尬苦況喎！
究竟係乜尷尬嘢？原來阿易覺得港鐵車廂中嘅扶手吊環太高，眼見好多嬌小女士都好難掂到，個個惟有逼晒喺車門扶住條柱。佢話咁樣搞到乘客入唔到車廂中間，令載客效率降低，如果港鐵將個扶手吊環校低少少就方便好多。
近排有航空公司想禁運魚翅，亦要佢出手調停。佢話暫時冇法例限制航空公司運乜嘢貨，但道理上只要唔係非法貨物，冇理由禁運喎，呢幾日就會約航空公司傾偈，諗吓點拆掂佢。佢話未上任都咁多嘢做，真係覺得上手劉健儀好犀利，能夠擺平咁多唔同勢力，今後要繼續跟佢學嘢。
易志明話航運交通界好多唔同勢力。（資料圖片）