政壇：慢必肚腩肉照唔公開
尋日係人民力量成員組織之一嘅選民力量成立兩周年紀念。包括候任立法會議員「慢必」陳志全、袁彌明、主席劉嘉鴻、「星屑醫生」歐陽英傑同林雨陽等核心成員，透露成班兄弟姊妹聽日去泰國蘇梅島玩番幾日，期間仲有人要求「出櫃」嘅慢必定要將啲着泳褲嘅相，放上社交網站畀啲志同道合嘅粉絲分享。但慢必嫌自己有肚腩，話唔會公開呢類肉照喎！
一眾團員都話選舉實在係太辛苦，點都要搵個機會鬆一鬆。林雨陽講笑話，所有行程都係由袁彌明安排，佢嘅唯一要求就係有充足時間瞓覺。
劉嘉鴻又話佢哋針對白鴿黨嘅票債票償運動經已完結，未來會思考點樣透過立法會嘅平台，加強群眾運動嘅組織同動員能力，擴大人力喺社會嘅影響力。
左起袁彌明、陳志全、嚴達明、林雨陽同歐陽英傑，一齊慶祝選民力量成立兩周年。