露宿本已無奈 何堪落井下石

係人都知，扶助弱勢社群，係政府義不容辭嘅責任，好可惜，現實同理想往往係另一回事。好似一班露宿者咁，無處容身，遭人白眼，本來已經好無奈，點知當局仲要落井下石，將佢哋嘅財物當垃圾棄置，你話係咪無良吖！

件事係咁嘅，今年二月食環署以洗街為由，喺未有通知下強行將十幾位露宿者嘅財物當廢物充公棄置，包括金錶、提款卡同身份證等，搞到露宿者要透過小額錢債審裁處追討賠償。食環署一口咬定當時有叫露宿者執拾個人物品，但有露宿者就話當局事前根本冇通知，甚至多次向現場警員要求取回個人物品都被拒。亦有露宿者指當日被警察「踢醒」，食署職員亦無提醒佢哋可執拾個人物品，想攞番對拖鞋都唔得。

即係咁，食環署要洗街清理環境，冇人話唔啱，但都唔使做到咁絕，將人哋嘅財物當廢物棄置o架。有頭髮邊個想做瘌痢吖，露宿者瞓街已經夠淒涼，食環署唔同情不特止，仲要百般滋擾，趕盡殺絕，簡直係麻木不仁。正如有社工話齋，過去食環署洗街都會提早一日通知，今次話洗就洗，完全不近人情。

無論點都好喇，露宿者嘅財物已經畀當局揼晒，搵都搵唔番，依家最緊要諗辦法補救啫。其實，露宿者要求食環署賠償嘅金額並唔係好多，每人索償三千至一萬元不等，總共四萬幾，對官府嚟講濕濕碎喇。點知食環署唔止唔認衰，連和解都費事傾，搞到裁判官亦忍唔住質疑食環署情理不通，簡直係嘥公帑。好喇，一拖再拖之下，案件尋日終於開審，可惜其中一名露宿者上月已經過咗身，話佢係含冤而逝，一啲都冇誇張o架。唔怪得有市民睇唔過眼，去到法院門外抗議，仲帶埋鮮花蠟燭悼念去世嘅露宿者。

嗱，喺輿論壓力之下，當局終於認衰，話已經向申索人發出調解守則和協議，只不過露宿者認為調解結果不應保密，所以未能達成共識喎。法官今次幫理不幫親，指摘政府相隔多月先肯踏出一步，浪費不必要時間，要求雙方日內必須得出和解協議。

講開又講，食環署麻木不仁嘅事例又點止咁。好似打壓小販，簡直勢兇夾狼，搞到小販跳河溺斃有之、畀車撞癱亦有之。人哋只不過自力更生，何必趕盡殺絕呢？講到底，港產官僚嫌貧愛富，點會將小販同露宿者放喺眼內吖，叮！