SUN微博：打橫嚟講：書店夜市大執笠

早前，台灣龍頭書店誠品，戴住品味光環，登陸香江，扮演文化使者，以君臨天下之勢，打救此地陸沉的文化沙漠！

果真，開檔初期，見一大批朝聖者慕名而至，其實，那只是香港人典型性格催使的行為，因港人最愛新屎坑而已！

香港老人家怕蝕底，正所謂執輸行頭慘過敗家，見人排隊，唔「貢」埋去哄吓，點知係唔係有錢分o架！新一輩的後生仔，則愛「打卡」，凡係talk of the town嘅嘢，定必早到為上，所以，誠品開張日，全店客仔，唔係嚟睇書買書的，只係嚟玩自拍，即時鋪上fb，潮嘛！最好笑的，就係呢間自詡過江龍的「文化大賣場」，搞個台式A貨通宵場，話歡迎任何人嚟不打烊的打書釘，一早就話佢哋會死無全屍o架啦！嗱！一個月之嘛！就要挾尾收皮，但仍死唔忿皺，話只是計劃試驗完畢，遲啲再作打算云云。

香港夜書市，唔係無得做，誠品之失敗，乃佢哋做得唔好啫！兼不了解香港市場所致，第一，佢哋入啲貨，十分流，不合香港人閱讀脾胃，文化味不足，cheap味又不夠，唔上唔落，正一吊吊揈，有無夜市，都注定死梗；第二，銅鑼灣區的夜市，不會旺於一座冷冰冰的死城；第三，周末搞的所謂「文化活動」，幾有文化呢？請問！第四……都係唔教佢哋咁多，反正，佢哋有咁多文化專家和搞手出糧出計，我做乜要益佢哋！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

就係咁爆：潮流興佔領

讀者可透過智能手機下載「東方互動」app，於「爆料」項上載影片，每個星期四《太陽報》及ontv同步大爆特爆！

email：sunweibo@opg.com.hk

「就係咁爆」網址：tv.on.cc/hot