政壇：米蘭站姚君達婚變投資者（目及）實

做二手名牌手袋起家嘅米蘭站上市之後，發展更大，最近公司主席姚君達爆出離婚消息，早前雅天妮創辦人謝超群同公司失去聯絡，迅速由老婆葉英琴接掌公司，難怪今次姚君達婚姻亮紅燈嘅消息傳出之後，投資者即刻關注姚君達會點樣分身家。

據公關老友講，查實姚老闆同老婆李麗紅屬於再見亦是朋友嗰隻，即係大家和平分手，兼且兩人關係至今仍相當良好，所以唔使太擔心米蘭站有咩股權問題咁話。根據佢哋公司年報，李麗紅因配偶身份，同姚君達共同持有米蘭站百分之七十二點二九權益，但係呢啲股權其實係由姚老闆全資實益擁有嘅唯美企業持有，所以李麗紅個人持有嘅米蘭站股份，只有嘅五十二點八萬股，佔已發行股本百分之零點零八。

點都好，計贍養費係好高難度嘅事，難得呢對夫妻嘅關係咁友好，投資者惟有希望唔好搞出麻煩事啦。