政壇：大舊石掌帳委會有阻滯

新一屆立法會雖然仲係候任階段，但建制派已密密協調立法會幾大委員會嘅主席人選，仲大致敲定添。大會主席預計由民建聯曾鈺成連任，地位等同大會副主席嘅內務委員會主席則九成九由經濟動力梁君彥出任；至於審批政府撥款嘅財務委員會估計係新早餐派嘅吳亮星同民主黨劉慧卿之爭。至於政府帳目委員會，據聞建制派會推薦地產及建造界嘅石禮謙（大舊石）做主席，但有議員擔心佢或有角色同利益衝突。

政府帳委會嘅主要職能係公審同譴責啲大花筒高官，為免角色衝突，已進身行政會議嘅李慧琼預料會自行退會，令建制派只係剩低大舊石一位舊人，喺揀無可揀之下，惟有推薦佢接任帳委會主席。泛民主派方面，新當選嘅會計界議員梁繼昌，更加可能會爭做副主席。

我哋初步了解議會成員對大舊石出掌帳委會嘅睇法，反應一致負面，批評佢開會一係唔出聲，一出聲就係講埋啲歪理撐政府同撐地產商。有人擔心審計報告內容或涉政府批地、收地及補地價等問題，由代表地產界嘅大舊石做主席，肯定會經常出現角色同利益衝突。