政壇：新立會梁陳係大戶

新一屆立法會選舉結束後，唔少議員都趁下個月十日復會前度假充吓電。由七十名議員組成嘅新立法會雖然壁壘分明咁歸屬泛民同建制，但細睇選舉結果，都有啲有趣小統計，譬如換屆選舉出現旺梁滯劉現象，即梁姓議員成功入主議會多，劉姓議員就相繼出局。此消彼長下，梁、陳兩姓做咗新議會嘅大戶。不過，梁姓議員雖然唔少，卻唔代表梁粉多。示威常客梁國雄、唐營大將梁君彥都係梁氏宗親會，未來喺立法會，睇怕唔少得梁梁交手嘅場面。

四姓佔近半議席

新立會有四成人、即二十八個屬議會新丁，呢批新人大大改變議會現狀。現屆立法會六十名議員中，有近一半議員屬於「李梁劉陳」四個姓氏，當中又以姓李嘅獨佔鰲頭，但隨住白鴿黨李永達、勞聯李鳳英等出局或唔玩，李姓已失去大戶資格，反而原本排其後嘅梁姓同陳姓升上首席，泛民陣營有梁家傑、梁耀忠、梁繼昌等；建制陣營都新增咗梁志祥等，「梁氏宗親會」穩居議會第一幫之位，如果再計埋CY都喺特首選舉中勝出，今年選舉唔通好旺姓梁嘅﹖

至於本來係大姓嘅陳氏，現屆立法會已經係大戶，有人民力量陳偉業、民建聯陳鑑林等，新一屆更因多名陳姓新人加入，如重返議會嘅工聯會陳婉嫻、首次領軍即當選嘅人民力量陳志全同民建聯陳恒鑌，卒之梁、陳分庭抗禮。

梁、陳喺選舉中表現超好，但劉姓就似乎運滯啲，建仔嘅劉江華同自由黨嘅劉健儀、建築及規劃界嘅劉秀成都落選，搞到本來有六個劉姓議員嘅立法會，新一屆銳減一半，失去半壁江山，好不唏噓。