上水站變水客站 執法不力亂象生

「為民除害，唔使用劍嘅！」一班網民為咗捍衞佢哋口中「有人情味，有文化」嘅樂土，發起一個名為「光復上水站」嘅行動，淨係聽個名都夠晒悲壯。正如有人話齋，如果中國政府好似呢班網民咁有決心，釣魚島就唔會被日本仔「國有化」喇。

係呢，「光復上水站」究竟係乜嘢一回事？係咁嘅，近年上水火車站被水貨客攻陷，搞到烏煙瘴氣，亂晒大龍。最弊係執法當局隻眼開，隻眼閉，對水貨客視若無睹，導致水貨兵團不停擴張，上水彩園路到工業區一帶全部淪陷，乘客怨聲載道。嗱，只要你去上水站參觀吓，就好容易見到咁嘅場面：水貨客推住一車車貨，橫衝直撞，險象環生，試過有市民被撞裂手骨添，問你驚未！

好嘞，有班網民終於忍無可忍，發起「光復上水站」行動，計劃喺上水站對開水貨客聚集嘅地方集體「等人」，實行以「堵」制「堵」，抗議水貨客霸佔地方。呢班網民做晒功課，定下「打不還手，罵不還口，召警支援」嘅三大原則，避免出現肢體衝突。咁就啱嘞，表達意見最緊要和平理性，千祈唔好搞出個大頭佛吖。

講開又講，上水站亂象叢生，搞到網民自己出嚟維持秩序，唔通當局唔覺得羞恥？其實，正因為官府靠唔住，執法部門無做好本分，網民先至自救咋。之前有市民向警方求救，點知警方居然話走水貨唔係犯法，佢哋做唔到嘢；而向食環署投訴，食環署就話水貨客無整污糟地方，亦唔關佢哋事喎。叮，個個部門都話唔關事，咁究竟關邊個事？唔通關乘客事？

水貨客嘅問題好明顯已經影響到火車站嘅秩序，亦好明顯影響到市民嘅日常生活，就算部門唔可以單獨執法，起碼應該盡快研究對策，諗吓可唔可以跨部門合作整治吖，一味推卸責任，搞到市民忍無可忍，遲早爆發衝突，你班港產官僚就自食惡果嘞。

話時話，內地放寬個人遊之所以引起咁大爭議，水貨客就係主要原因之一，當局執法不力，激化中港矛盾，呢條數點計先？保安局局長黎棟國日前視察過北區，承諾加強打擊水貨客，希望講得出做得到，千祈唔好學前朝政府咁，一味大隻講吖，叮！