SUN微博：黐筋網相：iPhone兵器譜新貴

新iPhone功能冇咩增進，只有機身加長，有唔少網民惡搞預測iPhone未來發展，先由第八代長到溢出褲袋、到間尺咁長嘅第十代，之後iPhone一腳踩入兵器譜，星球大戰第N集白武士所用長劍其實就係iPhone 20。去到第三十代，iPhone終於改變向上生長嘅演變方式，設計參考咗雙截棍，機身一分為二再用鎖鏈連結，即係你用一部iPhone嘅價錢就可以買到兩部機，簡直係粉絲們嘅福音！其實網民仲惡搞咗101代iPhone，就係台灣嗰棟101大廈，《Sun微博》裝唔落故此從略啦。

網民惡搞未必冇根據，iPhone本身的確唔係咩大發明，只係將幾種技術集合起嚟，仲會刻意棄用或者擱置一啲技術，等下次推新機再用，好似iphone 4將攝影功能由三百萬像素提升至五百萬像素，iphone 4S再提升到八百萬像素，技術上毫無創新，只係一班粉絲當然係一邊鬧，一邊乖乖畀錢買啦，生活態度嚟o架嘛。